వ్రణాలకు మూలికా వైద్యం ..!

శరీరంలో ఏ భాగంలోనైనా చిన్న చిన్న గడ్డలుగా ఏర్పడి క్రమేపీ వాపు, నొప్పి, మంటతో పెద్ద గడ్డలుగా మారి అందులో చీము చేరి పుండుగా బాధించే వాటినే ‘వ్రణాలు’ అని ఆయుర్వేదంలో పిలుస్తారు. వీటిలో కొన్ని ప్రాణాంతకంగా ఉంటాయి. అధికశాతం చికిత్స చేయవచ్చు. వ్రణాలకు సంబంధించిన చికిత్సను ఇంట్లోనే చేసుకోవచ్చు.

అవిశె గింజలను మజ్జిగలో మెత్తగా నూరి ఉడకబెట్టి పట్టిస్తే గడ్డలు పగిలి తగ్గిపోతాయి.
రావి ఆకులను వాపుతో కూడిన రక్త గడ్డలపై కప్పి కడితే త్వరగా ఉపశమనం వస్తుంది.

ఎండిన రావి పట్టను చూర్ణం చేసి పగిలిన గాయాలు, గడ్డలపై చల్లుతుంటే త్వరగా తగ్గుతాయి.
అత్తిపాలను వ్రణాలపైన, పుండ్లపైన రాస్తుంటే తగ్గుతాయి.
బచ్చలాకును మెత్తగా నూరి కొద్దిగా ఆముదం కలిపి ఉడికించి వెచ్చగా ఉన్నప్పుడు గడ్డలపై వేసి తడుతుంటే త్వరగా తగ్గుతాయి.
బాగా పండిన అరటి ఆకులను వ్రణాలపై వేసి కడితే చీముతో కూడిన రక్తాన్ని త్వరగా తగ్గిస్తుంది.

కలబంద గుజ్జును తీసి ఉడికించి వెచ్చగా ఉన్నప్పుడే వ్రణాలపై కడుతుంటే త్వరగా తగ్గిపోతాయి.
నల్ల నువ్వులను మెత్తగా నూరి తేనె కలిపి పట్టిస్తే మంచి ఫలితం కలుగుతుంది.

తులసి ఆకుల రసంలో పగిలిన వ్రణాన్ని శుభ్రపరచి ఆ రసంతో దూదిని తడిపి వ్రణంపై కడితే తగ్గిపోతుంది.

పాతబడిన ఎండు కొబ్బరి నుండి తీసిన కొబ్బరి నూనెను వ్రణాలపై రాస్తుంటే త్వరగా తగ్గిపోతాయి.
మెంతి ఆకులను మెత్తగా నూరి నేతిలో ఉడికించి వెచ్చగా ఉన్నప్పుడు పైన వేసి కడితే త్వరగా వ్రణాలు తగ్గుతాయి.
మర్రి పాలను ఉదయం, మధ్యాహ్నం, సాయంత్రం వ్రణాలపై రాస్తుంటే చీము, వాపుతో కూడిన వ్రణాలు త్వరగా తగ్గిపోతాయి.